Intezaar

Abhi abhi aayi yahan, aate hi na jaane kyon ek ajeeb sa ehsaas hone laga.
Intezaar shayad cheez hi aisi hoti hai, kitna mushkil hota hai intezaar karna. Wo bhi jab aapke paas bolne ke liye bahot kuchh ho aur aapko sunne wale ka intezaar karna pade.

Kitna lamba hota hai ye intezaar, waqt hi nahi kat-ta hai. Sochti hoon ki kuchh aur karoon lekin karoon bhi to kya. Lamhe muththi se raat ki tarah phisalte jaate hain, ek ek pal bojhal hone lagta hai, jaane kaisa hai ye intezaar.

Sochti hoon un logo ke baare men jo apni saari zindagi kisi ke intezaar men bita dete hain. Kaise log hote hain wo? Aaj tak samajh nahi paayi hoon shayad hi kabhi samajh men aaye ye baat.

Aaj subah kuchh der ke liye ghar se nikli thi, dekha meri gali men hi ek uncle hain budhe se jo apne bete ka intezaar kar rahe hain. Na jane kitne saal se unko aise hi dekh rahi hoon. Intezaar karte hue.

jab apne rabbits ke saath khelti hoon to wo bhi apne khulne ki baari aane ka intezaar karte hain. Ek ke khulte hi doosra bhi baith jata hai ki ab iske baad mujhe bhi khulna hai, ye bhi ek roop hai intezaar ka.

Kuchh nahi milta to maine socha kuchh likh hi daalte hain is intezaar ke upar lekin wo bhi nahi samajh men aaya. Aayega bhi kaise main bhi to yehi kar rahi hoon, INTEZAAR. Jaane kab khatm hoga ye intezaar.